Riwayat Kangjeng Nabi (Nadhom Sunda)

RIWAYAT KANGJEUNG NABI

(NADHOM BAHASA SUNDA)

بسم الله الرحمن الرحيم

1.      Gusti urang sarerea Kangjeng nabi anu mulya Muhammad jenenganana Arab Quraisy nya bangsana	2.      Ramana Raden Abdulloh Ibuna Siti Aminah Dibabarkeunna di Mekah Wengi Senen Tahun Gajah
3.      Robiul awwal bulanna Tanggal ka Dua Belasna April Bulan Masehina Tanggal ka-Dua Puluhna	4.      Ari Bilangan Tahunna Lima ratus cariosna Tujuh puluh panambahna Sareng sahiji punjulna
5.      Siti aminah misaur Waktos Babarna kacatur Ninggal cahaya mani ngempur Dibumina Hurung ngempur	6.      Babar taya kokotoran Orok lir kenging nyepitan Soca lir kenging nyipatan Sarta harum seuseungitan
7.      Medal Nabi akhir jaman Pirang-pirang ka anehan Sesembahan bangsa syetan Kabeh pada karuksakan	8.      Nabi yuswa lima bulan Tos tiasa angkat-angkatan Yuswana salapan bulan Tos capetang sasauran
9.      Yuswana sapuluh bulan Tiasa ameng papanahan Ngelehkeun budak nu lian Tapi tara kumagungan	10.  Parangina Kangjeng Nabi Jatnika pinuh ku puji Pinter tur gede kawani Sobar nyaah kasasami
11.  Nuju opat tahun yuswana Dibersihan manahna Nabi dibeulah dadana Malaikat anu meulahna	12.  Jibril kadua rencangna Mikail jenengannana Ngeusikeun kana manahna Ilmu Himah sapinuhna
13.  Tuluy dada kangjeng Nabi Gancang dirapetkeun deui Sarta teu ngaraos nyeri Dicap ku khotamin nabi	14.  Harita nabi ayana Dilembur Ibu Inangna Halimah jenengannana Sa'diyah ngaran lemburna
15.  Rama nabi kacaturkeun Pupusna kacarioskeun Basa Nabi di bobotkeun Dua sasaih kaunggulan	16.  Keurlima tahun yuswana Ditinggal pupus Ibuna Tuluy dirawat eyangna
17.  Kersana Robbul Alamin Kangjeng nabi nuperihatin Yuswana dalapan tahun yakin Eyangna mulih kabathin	18.  Sabada wafat eyangna Nabi dirawat uwana Abi Tholib kakasihna Saderek teges ramana
19.  Kangjeng Nabi sering pisan Dicandak kanagara Syam Sok nyandak barang dagangan Didinya the pajeng pisan	20.  Kacatur di eta nagri Loba pandita yahudi Sarta pandita nasroni Nutepang sareng kangjeng Nabi
21.  Sadayana sasauran Ieu jalma moal nyalahan Pinabieun akhir jaman Toret Injil Tos nGibeuran	22.  Sifat nabi panganggeusan Aya dianjeunna pisan Harita loba nu iman Ka Nabi ngangkeun panutan
23.  Lami-lami kangjeung Nabi Disambat kuhiji istri Dagang ka unggal nageri Kauntunganna dibagi	24.  Istri jenengan khodijah Putra huwailid katelah Nu pangbeungharna di Mekah Ka nabi kalangkung nyaah
25.  Siti Khodijah masrahan Ka Nabi barang dagangan Maesaroh nu ngarencangan Ka Nabi purah nyarengan	26.  Kacarios Maesaroh teh Loba pamendakna aneh Ciciren Nabi nu sholeh Matak ngaherankeun kabeh
27.  Tatangkalan uluk salam Mega bodas sok mayungan Sareng aaya cap kanabian Dina salirana pisan	28.  Pamendak Siti Khodijah Cocok pisan sareng Maesaroh Akhirna Siti Khodijah Ka Nabi mundut di tikah
29.  Harita yuswana Nabi Salawe tahun kawarti Ngadak-ngadak sugih mukti Tapi tambah sae ati	30.  Karesepna kangjeng Nabi Ka Gusti Alloh ngabakti Digunung hiro maranti Ibadahna saban wengi
31.  Didinya jol kasumpingan Jibril nu nurunkeun Qur'an Kalawan dawuh pangeran Nabi didamel utusan	32.  Harita yuswana Nabi Opat puluh tahun kawarti Di utus ku alloh pasti Ngembarkeun agama suci
33.  Anu iman pangheulana Siti Khodijah garwana Abu Bakar kaduana Shohabat anu pang mulyana	34.  Murangkalin nu nonoman Anu pangheulana iman Sayyidina Ali pisan Ka Nab Saderek misan
35.  Jeung ari jalma beulian Anu pangheulana iman Sayyidina Bilal kaleureusan Anu jadi tukang adzan	36.  Ari lolobana pisan Ka Nabi teh ngamusuhan Nganiyaya ngajailan Teu aya pisan ras-rasan
37.  Para shohabat kungsi ngalih Ka nagri Habsyi nu tebih Didinya anjeunna linggih Kira kenging tilu sasih	38.  Samulih shohabat ti Habsyi Kacarios kangjeung Nabi Kenging pohara cocobi Kersana nu maha suci
39.  Uwana sareng garwana Pada pupus duanana Harita Nabi yuswana Kalima puluh tahunna	40.  Geus pupus Siti Khodijah Nikah ka Siti saudah Sareng ka Siti Aisyah Umil Mu'minin katelah as
41.  Tidinya kersa pangeran Maparinan kamulyaan Ka Nabi nu akhir jaman Kakasih nu sipat Rohman	42.  Nuju tanggal tujuh likur Bulan Rojab anu kacatur Nurut kaol anu mashur Kangjeung Nabi teh disaur
43.  Dipapag ku malaikat Nyandak burok nu kasebat Leumpangna teh cara kilat Tunggangangeun  Nabi angkat	44.  Ti Mekah ka Baetal Muqodas Teu nganggo lami antawis Ku jalma heunteu ka tawis Kersana gusti nu wacis
45.  Ti Baetal Muqodas terasna Naekna tangga kancana Mi'roj tea kasebatna Ka langit Nabi sumpingna	46.  Tujuh langit sadayana Sareng aras nu pang luhurna Di sumpingan sadayana Katut surge narakana
47.  Kangjeung Nabi ditimbalan Ku Gusti nu Sifat  Rohman Anjeunna kudu netepan Solat muji kapangeran	48.  Kabeh jalma anu iman Sami pada kawajiban Solat nu lima giliran Heunteu meunang dikurangan
49.  Sholat eta minangkana Dina agama tihangna Jalma nu luput sholatna Nyata rubuh agamana	50.  Kacarios dina jaman Mi'rojna Nabi panutan Yuswana teh kaleresan Lima puluh dua jalan
51.  Kapir Mekah kacaturkeun Bareung Nabi nyarioskeun Mi'roj lain dimulyakeun Anggur pada nyeungseurikeun	52.  Pada hasud ngakalakeun Ti dinya Alloh ngersakeun Kangjeung Nabi di alihkeun Ka Madinah disirnakeun
53.  Para shohabat pirang-pirang Nu bumela milu iyang Milu ngalih sewing-sewang Heunteu pisan sumureang	54.  Tambah kamulyaan Nabi Di Madinah asal sepi Jadi rame kunu ngaji Muji ka nu maha suci
55.  Sapuluh tahun lamina Di Madinah jumenengna Agama Islam cahyana Gumebyar kamana-mana	56.  Nagri mekah diperangan Akhirna kaboyong pisan Nabi tambah kamulyaan Yakin lain jijieunan
57.  Ari yuswa kangjeng Nabi Geunep puluh tilu pasti Makomna dijero nagri Madinah nagara suci	58.  Puputrana Kangjeung Nabi Aya opat anu istri Siti Jainab anu kahiji Rukoyah anu hiji deui
59.  Ummi Kulsum anu katiluna Siti patimah bungsuna Ari putra nucikalna Sidna Qosim kakasihna	60.  Sidna Abdulloh rayina Ibrahim anu katiluna Eta nugenep putrana Siti Khodijah putrana
61.  Sidna Ibrohim Ibuna Mariyah jenengannana Istri ti Mesir asalna Tah kitu turunannana	62.  Putra nu pameget kabeh Pupus Keur aralit keneh Anu istri carogena the Para shohabat anu sholeh
63.  Siti Jainab anu carogena Abul Ash jenengannana Siti Rukoyah carogena Sidna Usman mimitina	64.  Geus Siti Rukoyah hilang Anjeunna turun ka ranjang Ummi Kulsum putrid lanjang Ditikah gentos nu hilang
65.  Caroge Siti Patimah Sidna Ali nu katelah Bakaromallohu wajhah Anu kamasyhurkeun gagah	66.  Ari putu Kangjeng Nabi Dalapan pamegeut istri Siti Umamah jeung Ali Ti Siti Jainab kawarti
67.  Ari sidna Abdulloh mah Putu ti Siti Ruqoyah Putu ti Siti Patimah Aya lima kabehannana	68.  Tilu anu pamegetna Sidna Hasan kakasihna Sidna Husain ka duana Sidna Muhsin katiluna
69.  Ummi Kulsum anu istrina Ka Sidna Umar nikahna Siti Jainab kaduana Nurut ungeling wartosna	70.  Urang kudu cinta ati Nyaahna langkung ti misti Ka umatna jaleur istrina Leuwih tisapuluh pribadi
71.  Weulas asih kanu miskin Sumawon kabudak yatim Pada seubeuh ku paparin Kadaharan jeung pisalin	72.  Akuan ka urang kampong Calik satata ngariung Tara angkuh jeung adigung Sanajan ka urang gunung
73.  Ka nu nyandang kasusahan Geuring jeung papatenan Ngalayad sarta ngubaran Ngajajapkeun ka kuburan	74.  Manis saur manis budi Estu mustikaning jalmi Sajagad mo mendak deui Sae rupi jeung parangi
75.  Raray lir ibarat bulan purnama Halisna lir katumiri Waos lir inten biduri Salira harum wawangi	76.  Estu kersaning pangeran Lain seungit diminyakan Keringet pada nandean Diparake seuseungitan
77.  Sakitu Nabi mulyana Taya pisan adigungna Angkat pungkureun shohabatna Kalangkung handap asorna	78.  Anggoan keursa lumayan Najan nu geus ditambalan Kitu deui katuangan Banget pisan dikurangan
79.  Betah dina kamiskinan Lain sabab teu kagungan Ngahaja bae ngirangan Ngarah karidhoan tuhan	80.  Pirang-pirang mu'jijatna Tawis kanabiannana Qur'an nu nomor hijina Muji'jat nu pangmulyana
81.  Tangkal nu perang daunna Disiram tilas abdasna Ngadadak loba buahna Sarta hirup satuluyna	82.  Domba nu bangeut kuruna Sartana lepet susuna Di usap ku pananganna Nadadak juuh susuna
83.  Dina hiji waktos deui Sohabat kakirangan cai Teras bae kangjeung Nabi Mundut cai anu kari	84.  Cai ngan saketel pisan Taya deui anu liyan Nabi neuleumkeun pananganDumadak tuluy manceran
85.  Cai mancer loba pisan Kaluar tina panangan Sela-sela ramo pisan Cukup ku jalma rebuan	86.  Kacatur hiji badewi Ngadoja ka kangjeng Nabi Nitah nyaur tangkal kai Sina ngomong cara jalmi
87.  Tuluy tangkal teh di sauran Harita ku Kangjeung Rosul Tangkal dating ngagulusur Akarna teh digugusur	88.  Ngadeuheus ka Kangjeng Nabi Uluk salah cara jalmi Sanggus kitu balik deui Katempat asalna tadi
89.  Badewi teh mung kantun heran Ninggal eta kaanehan Tuluy bae asup islam Ka Nabi ngangkeun panutan	90.  Salianna loba deui Mujijatna Kangjeung Nabi Mun diwincik hiji-hiji Keur nulisna moal mahi